Studie verbind chemikalie met moontlike miskraamrisiko
Die Associated Press
Sondag, 13 Okt. 2013 | 21:31
Nuwe navorsing dui daarop dat hoë vlakke van BPA, ’n chemikalie in baie plastiek en blikkieskos se voering, die risiko van miskraam by vroue wat geneig is tot daardie probleem of wat sukkel om swanger te raak, kan verhoog.
Die werk is nie by verre genoeg om ’n verband te bewys nie, maar dit dra by tot "die biologiese waarskynlikheid" dat BPA vrugbaarheid en ander gesondheidaspekte kan beïnvloed, sê Dr. Linda Giudice, ’n Kaliforniese biochemikus en voorsitter van die American Society for Reproductive Medicine. Die studie is Maandag by die groep se jaarlikse konferensie in Boston aangebied. Verlede maand het ASRM en ’n groep verloskundiges meer aandag gevra vir omgewingschemikalieë en hul potensiële gevare vir swanger vroue.
BPA, kort vir bisfenol-A, en sekere ander omgewingschemikalieë kan baie swak, hormoonagtige effekte hê. Toetse toon BPA in byna almal se urine, alhoewel die chemikalie in die afgelope jare uit bababottels en baie herbruikbare drinkhouers verwyder is. Die federale Food and Drug Administration sê BPA is veilig soos dit nou in ander voedselhouers gebruik word.
Die meeste miskrame is te wyte aan eiers- of chromosomeprobleme, en ’n studie met muise het voorgestel dat BPA daardie risiko kan beïnvloed, sê Dr. Ruth Lathi, ’n voortplantingsendokrinoloog by Stanford Universiteit.
Met ’n federale toekenning het sy en ander navorsers 115 pas swanger vroue met ’n geskiedenis van onvrugbaarheid of miskraam bestudeer; 68 het uiteindelik miskrame gehad en 47 het lewende geboortes gehad.
Navorsers het bloedmonsters ontleed van toe die vroue swanger gevind is en hulle in vier groepe verdeel op grond van BPA-vlakke. Vroue in die boonste kwart het ’n 80 persent groter risiko van miskraam gehad in vergelyking met dié in die onderste groep, al was hulle soortgelyk in ouderdom en ander faktore.
Omdat die studie egter relatief klein is, was daar ’n groot reeks moontlike risiko’s – van net effens verhoog tot soveel as 10 keer hoër.
"Dit kan wees dat vroue met hoër BPA-vlakke ander risikofaktore" vir miskraam het wat deur BPA versterk kan word, sê Lathi. Die studie is nie ’n rede tot alarm nie, maar "dit is ver van gerusstellend dat BPA veilig is" vir sulke vroue, sê sy.
Om BPA-blootstelling te beperk, moet jy vermy om kos in plastiek te kook of op te warm omdat hitte die chemikalie laat lek, sê sy. Moet nie waterbottels in die son laat staan nie, beperk die gebruik van blikkieskos en vermy om kontantregisterkwitansies te hanteer, wat dikwels met hars bedek is wat BPA bevat. "Dit is onmoontlik om dit heeltemal te vermy," sê Lathi.
